Héctor Guerra e o Mago Teto rende homenaxe á maxia dos afiadores en Boiro

Este venres 15 de outubro temos en Boiro unha cita co ámbito creativo onde se xuntan a maxia e a cultura tradicional galega. Estamos a falar do espectáculo O afiador, que van ofrecer Héctor Guerra (actor e director) e o Mago Teto no auditorio da Casa da Cultura local. A cita, que comeza ás 20.00 horas, será moi axeitada para público infantil e familiar. O aforo é limitado, e as entradas estarán dispoñíbeis na Casa da Cultura, no mesmo día da función, a partir das 18.00 horas.

O afiador é un espectáculo que xira ao redor dunha roda de afiar dos anos trinta, herdada polo Mago Teto dos seus antergos. O afiador, un oficio que tivo o seu apoxeo nos séculos XVIII e XIX (e practicamente extinguido no século XX), desprazábase centos ou milleiros de quilómetros por uns meses, mesmo anos, coa única compaña da súa roda. Miles de historias e aventuras doutros tempos chegan á escena, da man deste espectáculo, coa axuda do ilusionismo.