Coa presenza de varios particulares e membros das comunidades de montes, nos que se insire este proxecto do Concello de Rianxo, mantívose unha xuntanza no Salón de Plenos, para dar a coñecer polo miúdo o seu desenvolvemento.
Abrangue unha zona especialmente rica en xacementos arqueolóxicos, especialmente mámoas e petróglifos, para os que se trazou un proxecto para garantir con medios propios do municipio a limpeza da contorna, eliminando a matogueira inmediata e desbroce durante tres anos dirixindo un arqueólogo estes labores. Trátase dunha zona entre Leiro e Isorna até Asados, desde o Os Mouchos a Monte Picouto. Inclúe espazos como a Foxa Vella, Os Campiños, o Monte Pelotiño, con mostras relevantes e que configuran un percurso de grande interese histórico. Tamén é moi relevante o efecto que a limpeza ten fronte os incendios forestais.
Para explicar o proxecto asistiu o arqueólogo redactor, Mario Cesar Vila, o concelleiro de patrimonio, Xavier Ares, e o Alcalde, Adolfo Muíños, que expuxeron os obxectivos, a metodoloxía de traballo e a petición aos propietarios de que dean o permiso oportuno para executalo. Sería despois remitido a Patrimonio, con quen xa se avanzou o seu desenvolvemento.
Hai varios anos o Concello xa realizara unha limpeza importante dos Campiños e procúrase a continuidade deste labor, así como seguir apoiando sexa declarado BIC como aprobou o pleno rianxeiro.
