Os actores (e narradores orais) Carlos Blanco e Oswaldo Digon van estar os días vindeiros en Porto do Son para achegarnos ás historias reais (e un algo fantásticas e terroríficas, pero non por iso menos reais) dos seus respectivos lugares de orixe, Arousa por unha banda, e Os Ancares, pola outra. Estamos a falar do espectáculo Quen dixo medo, un feixe de monólogos a dúas bandas previsto para o día 31 de outubro, ás 20.00 horas, na Casa a Cultura de Porto do Son. As entradas pódense adquirir na Casa da Cultura dende o mércores 20 de outubro ás 10.00 horas.
Quen dixo medo é, segundo advirten Blanco e Digon, un espectáculo metade improvisado metade preparado no que se deixa ao público quen decida o rumbo temático da función, permitíndolle elixir o miolo de cada monólogo. O resultado: non hai dúas representacións iguais da mesma proposta. O show foi creado durante o confinamento e, se cadra para compensar a ausencia de contacto co público naqueles días, é unha das contribucións máis interactivas (co público) que teñen pasado polas táboas da nosa terra.