A Consellería do Medio Rural, a través da Axencia Galega da Calidade Alimentaria (AGACAL), ten previsto organizar un curso sobre iniciación e mellora da gandaría de ovino-cabrún no concello coruñés da Pobra do Caramiñal. Desenvolverase dende o vindeiro luns 11 ata o sábado 16 de outubro no auditorio do museo Valle-Inclán en horario de 9:00 a 14:00 horas.
Esta iniciativa está dirixida “a calquera persoa vinculada profesionalmente ou con expectativa de incorporación aos sectores produtivos relacionados coa agricultura, gandaría, industria agroalimentaria e cadea forestal-madeira, así como aos mozos e mozas do rural galego interesados neste eido”.
Ao longo das 25 horas, o curso afondará en diversos temas como a situación actual do sector, a alimentación destes animais e os seus requirimentos, así como o manexo e implantación de pradeiras ou as axudas básicas ás que poden acceder os gandeiros. Ademais, a acción formativa tamén contará cunha visita a unha gandaría da zona para a posta en práctica dos coñecementos adquiridos previamente.
As persoas interesadas en participar nesta acción formativa deberán cubrir o correspondente formulario de solicitude e remitilo á conta transferenciatecnoloxica.cmr@xunta.gal. Para máis información, poden chamar ao teléfono 981 546 689.
Ovellas nunha imaxe de PepedoCouto publicada na Galipedia
