A Mostra de Teatro de Ribeira está a ser novamente un éxito de público na súa edición 2021. De feito Concello de Ribeira vén de informar de que xa case se vendeu a totalidade das entradas para o festival escénico. En concreto, nestes días chegáronse a dispensar más de máis de 160 bonos, quedando só unha trintena dispoñíbeis.
O Concello engade que os bonos que resten a partir do vindeiro luns poderán adquirise como unha entrada individual para a función correspondente a esa semana, neste caso a peza Mocos de Contraproducións.
O luns 4 de outubro, primeiro día da venda, dispensáronse máis de 120 bonos de 25 euros. Estes bonos permiten o acceso ás nove funcións. As entradas para unha única obra teñen un prezo de 4 euros e comezan a venderse ó principio de semana de cada estrea.
O concello de Ribeira, manterá o aforo do Auditorio Municipal ó 75% durante toda a mostra por precaución sanitaria.
Últimos días de Noir Blanc
Dende Cultura do Concello de Ribeira tamén fan saber que a exposición do noiés Xosé Luis Veiras Manteiga, Noir Blanc, quedará clausurada o sábado 9 de outubro. Pódese visitar no Centro Cultural Lustres Rivas de 10.00 a 14.00 e de 19.00 a 21.00 durante a semana e o sábado de 11.00 a 14.00.
