A Fundación Matrix dará a coñecer nos institutos de Ribeira e Vilagarcía a realidade do cambio climático nas nosas illas

Os institutos de Ribeira, Vilagarcía, Bueu e Vigo van recibir este mes de outubro a visita dos integrantes da Fundación Matrix para presentar, nos centros, os resultados do proxecto Climillat, unha iniciativa de investigación e divulgación que pon o foco no cambio climático e en como está a afectar (e afectará) aos ecosistemas do Parque das Illas Atlánticas de Galicia e a súa área de influencia. O obxectivo das actividades é “fomentar na xente nova actitudes que favorezan a protección ambiental e a promoción de comportamentos sustentábeis”.

O proxecto Climillat, financiado con cargo o programa de subvencións da Consellería de Medio Ambiente, Territorio e Vivenda e a Red de Parques Nacionais, recolle un estudo con datos cuantitativos sobre a realidade do cambio climático recente no Parque Nacional Marítimo-Terrestre das Illas Atlánticas de Galicia e a súa contorna próxima.

O principal obxectivo deste proxecto é dar a coñecer os resultados obtidos e impulsar unha campaña de sensibilización social dirixida principalmente ao alumnado de Bacharelato dos concellos máis próximos ao dito espazo de protección e indirectamente á sociedade galega.

As charlas celebraranse no mes de outubro de forma telemática, e estarán dirixidas por Alberto González, investigador especialista en climatoloxía da Fundación Matrix. A súa misión será transmitir aos máis mozos cal é o estado actual do clima na área de estudo e o seu recente cambio acontecido.

“Queremos que os alumnos sexan conscientes da realidade do cambio climático dende unha perspectiva local, e fomentar a promoción de comportamentos sustentábeis que reduzan as emisións de CO2 e coiden do medio ambiente”, sinala Alberto González, engadindo que “o cambio climático é unha realidade incuestionábel, e os espazos protexidos son excelentes observatorios para o seguimento do cambio global. Queremos levar os resultados obtidos do noso estudo á máxima cifra de colexios e institutos, para concienciar os mozos e mozas da importancia de comprometerse na loita contra o quecemento da Terra”.