Nos últimos meses, o Grupo Municipal Popular de Ribeira observou un aumento preocupante de entulleiras incontroladas no municipio, o que constitúe un serio problema tanto ambiental como de saúde pública, ademais de afectar negativamente a imaxe da nosa cidade é por iso que presenta unha proposición ao Pleno da Corporación Municipal de Ribeira.
O pasado mes de marzo, o Grupo Municipal Popular denunciou que o goberno municipal convertira en entulleira unha leira situada en Deán Grande, a cal estaba destinada a ser un aparcamento veciñal. A día de hoxe, a metade do solar segue chea de residuos sen recoller, causando malestar entre os veciños.
Desde o Grupo Municipal Popular destácase que é obrigación do goberno municipal, do mesmo xeito que de calquera empresa ou particular, contar cun xestor autorizado para a correcta disposición de entullos e outros materiais en desuso. Con todo, paseando polo municipio, é fácil atopar restos de obras, plásticos e latas de pintura. Zonas como Couso e os arredores da parroquia de Aguiño, especialmente na área coñecida como Demarsa, mostran unha acumulación significativa de entullos, o que representa non só un risco contaminante, senón tamén un impacto visual negativo en áreas de alto valor paisaxístico.
Segundo os populares é crucial que a administración local, a máis próxima ao cidadán, sexa un exemplo de boas prácticas. O goberno municipal debe xestionar adecuadamente os residuos, especialmente aqueles materiais que polas súas características ou perigo requiren un tratamento especial. Non é aceptable que vehículos municipais vertan entullos en recintos municipais ou abandonen todo tipo de elementos en solares de uso comunal.
O Grupo Municipal Popular avoga por unha Ribeira que avance cara a unha mentalidade máis verde e sostible, salientando a concienciación, a prevención, a vixilancia e o castigo a quen non cumpran coas normativas. A responsabilidade de manter limpo a nosa contorna debe comezar en cada fogar, promovendo accións que reflictan o noso compromiso co medio ambiente.
Por todo isto os popualres solicita:
1- O control rigoroso por parte do executivo local de manter unha reciclaxe correcta cos residuos xerados pola propia
administración nas labores diarias.
2- A retirada de todos os vertedoiros incontrolados identificados á maior brevidade, xa que supoñen un perigo medioambiental
así coma unha degradación da imaxe paisaxística e ambiental do noso concello.
3- A posta en marcha dun Plan de prevención e sensibilización que conte cunha intensificación da vixilancia nos puntos
reiterativos de vertidos incontrolados co obxectivo de identificar aos infractores e aplicar as sancións sinaladas na normativa reguladora, así como a posta en marcha dun plan de prevención e sensibilización que axude a erradicar en orixe esta problemática.
