Este venres 15 de outubro toca falar das músicas e as películas que nos marcaron, e de que até punto se teñen entrelazado as dúas linguaxes artísticas na nosa memoria. Estamos a falar do coloquio O Jazz e o cine: as bandas sonoras, os intérpretes, as cancións, previsto para as 18.00 horas na Sociedade Liceo de Noia. A sesión, encadrada no programa da edición 2021 da Mostra de Curtas de Noia que se celebrou os días pasados, será presentada e moderada por charla Luís G. Cuntín, director da emisión radiofónica Tempo de Jazz (Radio Redondela e Radio Fusión), axente artístico e promotor.
A charla contará tamén coa presenza dos seguintes profesionais do sector:
• Nani García. Pianista de jazz e compositor de bandas sonoras para o cinema, segundo a organización da charla “seguramente o único artista español en activo con esa dupla condición”. Gañador dun Mestre Mateo e varias veces nomeado aos Goya, Oscar e aos Premios Globo de Oro.
• Alberto Conde de León. Pianista, compositor e líder; profesor no CMus da Coruña na especialidade de jazz.
• Alberto Ibarrondo, Director do Festival de Jazz de Vitoria-Gasteizko Jazzaldia.
• Íñigo Zárate Ruíz de Gauna, Presidente da Asociación Cultural Festival de Jazz de Vitoria-Gasteizko Jazzaldia.
Unha estreita relación
Segundo lembran dende Cultura de Noia, o jazz e o cine teñen unha relación estreita como artes que naceron, desenvolvéronse e alcanzaron a súa madureza como parte da cultura de masas no século XX: “O cine encontrou no jazz un motivo de inspiración, un ambiente, unha arte que glosou con maior ou menor acerto; tamén un xénero específico de música que lle proporcionou destacadas bandas sonoras”. Pola súa parte, “o dito estilo musical tivo e ten no cinema un vehículo para darse a coñecer e unha fonte de inspiración, nomeadamente pola incorporación de grandes cancións nacidas para a gran pantalla como motivos de inspiración recorrentes, os chamados standards, para a súa recreación nesta singular linguaxe musical”.
Neste faladoiro os participantes achegarannos á historia e á vixencia actual desa histórica e frutífera relación.
