O doutor Xosé García Bustelo recibiu o IX Premio Internacional –polo seu labor no ámbito preclínico que permitiu avanzar no coñecemento da orixe do cancro– e o doutor César Serrano García recibiu o II Premio Talentos Emerxentes –pola súa investigación en sarcomas-
O Premio Internacional está dotado con 20.000 euros e o destinado aTalentos Emerxentes ten unha contía de 6.000 euros.
Ramiro Carregal asegurou sentirse dobremente feliz neste acto por: “A difícil situación que vivimos e polas persoas que foron premiadas: César Serrano, un doutor aínda moi novo e cunha prometedora carreira, e o galego Xosé Bustelo, un dos investigadores máis relevantes do momento no ámbito oncolóxico”.
No acto, o presidente da Xunta, Alberto Núñez Feijóo, comprometeu a aposta da Xunta pola prevención, a detección precoz e a innovación na loita contra o cancro.
O presidente do Goberno galego, Alberto Núñez Feijóo, afirmou hoxe que a Xunta seguirá apostando pola prevención, a detección precoz e a innovación para avanzar na loita contra o cancro.
Durante a entrega do IX Premio Internacional de Investigación Oncolóxica Científica e Técnica Ramiro Carregal e do II Premio Ramiro Carregal a Talentos Emerxentes en Investigación Oncolóxica, Feijóo destacou algunha das medidas postas en marcha na Comunidade nos últimos anos como os programas de detección precoz de cancro de cérvix e de cancro colorrectal, ademais do de cancro de mama.
Así mesmo, recordou as melloras implantadas nas fases de diagnóstico e tratamento, coa creación das vías rápidas para atender a pacientes sospeitosos dunha patoloxía grave en menos de 15 días; ou coa aprobación do decreto de garantías de tempos máximos de acceso ás prestacións sanitarias, un texto que asegura a atención hospitalaria programada e non urxente nun prazo de 60 días para intervencións cirúrxicas e de 45 días para as primeiras probas diagnósticas.
Sobre este último punto, resaltou que ata xuño deste ano máis de 36.000 galegos beneficiáronse desta garantía.
En relación á aposta pola innovación, Feijóo resaltou a instalación de sete robots cirúrxicos Da Vinci de alta precisión e confirmou un investimento de 2,5 millóns de euros para a posta en marcha do primeiro centro de produción de medicamentos CAR-T na Comunidade, para producir fármacos destinados a terapias celulares; así como o obxectivo de incorporar ao sistema sanitario galego a protonterapia para o tratamento de tumores sensibles.
O presidente da Xunta concluíu referíndose á excepcionalidade destes premios tanto pola vocación filantrópica de Ramiro Carregal como polo talento e o compromiso dos premiados, reflectidos nas súas achegas ao coñecemento.
