A igrexa de Santa Columba de Rianxo é escenario este sábado 18, ás 20.45 horas, do concerto comentado “A maxia da música española”. Será un repertorio integrado por obras de grandes mestres españois de finais do século XIX e comezos do XX, entre os que figuran Pablo de Sarasate, Isaac Albéniz, Enrique Selectos e Manuel de Falla.
O concerto correrá a cargo do grupo galego “Ensamble Iulius XIII”, nesta ocasión en formato de trío, composto por Carmen Ferreiro Soto (frauta), Alfredo Gómez Sieiro (clarinete) e Ludmila Shevyakova (piano). A formación interpretará arranxos propios, e comentará co público as diferentes obras, achegando así coñecementos sobre o compositor e a época musical na que se crearon.
A actuación será gratuíta, dado o seu carácter divulgativo e de revalorización da música de pentagrama e partitura. Xurdido da fusión doutros grupos precedentes, este ensamble convértese en 2008 na formación residente de música de cámara do proxecto Iulius XIII.
