A contadora, escritora e actriz Raquel Queizás vai estar este 10 de setembro en Boiro para ofrecer un espectáculo directamente encamiñado a fortalecer o espírito libre e creativo que todas as nosas crianzas levan dentro. Trátase do espectáculo Dámoslle volta ao conto! A cita será ás 20.00 horas no Lavadoiro da Boliña. Está destinado a público infantil e familiar. A capacidade será limitada por mor da COVID e a reserva de entradas deberá facerse na web municipal dende dous días antes da función.
O espectáculo, amais dunha reivindicación da igualdade e da diversidade, é unha homenaxe da autora á súa avoa, que “con 14 aniños xa gañaba para manter á familia, que non foi á escola e que ao chegar a noitiña montaba na burra para atravesar a raia seca e voltar cargadiña de café, aceite, sabas,… de Portugal”. Da súa boca aprendeu Raquel Queizás contos descoñecidos, “de mulleres donas do seu destino e de homes que se liberan da máscara da masculinidade e permítense mostrar a súa sensibilidade”.
Dámoslle volta ao conto xunta contos tradicionais de diferentes culturas e historias de vida, con obxectos e monicreques. Está especialmente dirixido para nenas e nenos a partir de 3 anos e familias.
