Este sábado 2 de outubro vaise celebrar en Rianxo a segunda edición do Foro de Alfombrismo de Galicia e Patrimonio Inmaterial, co-organizado pola asociación local Ondiñas Mainas en colaboración co Concello. As actividades desenvolveranse durante toda a xornada no Pazo de Rianxiño, aínda que a partir das 18.00 horas está previsto o encontro en si mesmo de artesáns (pola mañá haberá un obradoiro colectivo onde traballarán alfombristas de diversos recantos de Galicia creando unha obra temática).
Pola tarde haberá dúas conferencias e nelas participará Rafa Quintiá, abordando a relevancia de preservar o patrimonio inmaterial, e máis Carmen Santos, que afondará no alfombrismo dende un punto de vista sustentábel.
Tamén está prevista unha actuación do grupo local Barahúnda.
Participarán presencialmente, no encontro de artesáns, preto de medio cento de creadoras e creadores de toda Galicia, incluídos boa parte dos concellos da nosa contorna. Por outra banda, está programado conectar a través de streaming con artesáns doutros recunchos de España e de países como Portugal, México ou Italia.
Ao abeiro deste evento, celebrarase unha exposición na Biblioteca Municipal de Rianxo sobre o alfombrismo na nosa terra. A mostra desenvolverase entre o 4 e o 17 de outubro.
A primeira entrega deste foro celebrouse o ano pasado en Bueu, en por cen en liña, e nela achegaron conferencias a noiesa Ana Filgueiras Rei e o rianxeiro Carlos Henrique Fernández Coto.
Para máis información sobre a nova entrega, cómpre visitar o Facebook de Ondiñas Mainas, onde se está subministrar completa información sobre o programa de actividades.
