O secretario xeral de Industria e Pequena e Mediana Empresa do Ministerio de Industria, Consumo e Turismo, Raúl Blanco Díaz, visitou este 14 de setembro o concello de Boiro para coñecer de primeira man as liñas de traballo do equipo de Goberno local en materia produtiva e empresarial. Á súa chegada foi recibido polo alcalde, José Ramón Romero, e o tenente de alcalde, Luis Ruiz. Amais, acudiu acompañado da subdelegada do Goberno na Coruña, María Rivas.
O alcalde expúxolle algúns dos proxectos polos que o Concello de Boiro quere apostar e adiantoulle as liñas de traballo no ámbito industrial para o desenvolvemento da localidade: “Boiro é unha localidade moi dinámica e con moitas inquedanzas en materia empresarial e que ten moitas posibilidades de progreso”, afirmou o rexedor.
Durante a visita, o secretario xeral de Industria e PEME puxo en valor o sector produtivo local e eloxiou a súa importancia, que “vai moito máis alá do estritamente económico, xa que o seu valor social, cultural e territorial é moito máis amplo”. Raúl Blanco mostrou o seu compromiso co “traballo conxunto en proxectos de futuro para Boiro e para a súa industria”.
