O Rotogal Boiro Voleibol loitará pola Copa Galicia pasadomañá en San Sadurniño

A edición número 38 da Copa Galicia masculina dispútase pasadomañá (domingo 26 de setembro) en San Sadurniño. O Rotogal Boiro Voleibol iniciará o camiño cara ao título autonómico cun enfrontamento ante o anfitrión Aldebarán San Sadurniño ás 12.00 horas. A outra semifinal xogarana o Emevé, vixente campión, e o Dumbría ao dez da mañá. Os gañadores de ambas as cruces mediranse ao sete da tarde na final, dúas horas despois de que arrinque o choque polo terceiro e cuarto posto.

Marcelo “Chino” Benavídez, adestrador do Rotogal Boiro Voleibol, afirma que “o equipo chega á Copa Galicia moito mellor que a semana pasada, xa temos unha boa carga de adestramento e física sobre case todos os xogadores, así que estamos a esperar ansiosos o domingo para poder debutar nun partido oficial e ver para que estamos preparados”.

O Rotogal comparece no torneo autonómico despois de medirse en dúas ocasións, con resultado adverso, ao Emevé de Lugo. No entanto, Marcelo réstalle importancia a este acontecemento de pretemporada e engade: “Foi unha fase baseada na preparación física e técnico-táctica. O importante será a partir deste fin de semana para ver como rende o equipo co cadro de persoal ao completo”.

O adestrador apuntou que está previsto que o oposto José Carlos Romero se incorpore este 24 de setembro ao Rotogal Boiro Voleibol. “Seguramente adestrará hoxe e mañá para ver se pode participar no partido do domingo”, avanzou o técnico arxentino.

A maiores de todo o devandito, o club informou de que o Rotogal Boiro Voleibol debutará na superliga masculina o sábado 2 de outubro na cancha do Guaguas, o vixente campión da competición. Antes desa cita, o equipo de Marcelo Benavídez podería disputar outro partido amistoso. “Despois da Copa Galicia, tentaremos atopar algún equipo preto da nosa zona para xogar antes de viaxar a Canarias, pero non é seguro”.