O Festivalo de Manselle (Dodro) celébrase finalmente este sábado 2 de outubro

Finalmente, por mor das inclemencias meteorolóxicas que imperaron os días pasados na nosa terra, tivo que ser adiado o certame Festivalo de Dodro, unha das grandes citas culturais deste remate da tempada na nosa contorna. A organización tomou a decisión de trasladar a cita a este sábado 2 de outubro.

O programa mantense e incluirá as actuacións musicais de Secho (quen vén de lanzar un convite dende as redes sociais para achegarnos ao histórico Valo de Manselle, centro de operacións do festival) e Berlai. Será como dixemos en Manselle a partir das 21.00 horas. O festival conta co apoio da Deputación da Coruña e máis do Concello de Dodro.

Secho é un artista local que comezou a súa andaina co disco Xa fai un tempo (2016), publicado coa banda imaxinaria Os Invisibles. Estes meses está presentado Recuperar, que está a ter moi boa aceptación nas plataformas en liña (tal e como se desprende das reproducións obtidas en Youtube polo tema As sensacións)

Polo que respecta a Berlai, é o proxecto musical do artista compostelán Xiao Berlai, que nos vén de dar a coñecer un máis que interesante traballo discográfico xerado e madurado durante o confinamento pola COVID, Cas Berlai, chegado logo do éxito de pública e crítica do seu primeiro traballo, Desconhecido.