O vindeiro sábado 2 de outubro, ás 20.30 horas, a compañía de danza do bailarín Fran Sieira achégase á Sala Arcos Moldes do Auditorio de Rianxo co espectáculo DeMente. A entrada é gratuíta previa reserva de localidades na web municipal (preferentemente) ata as 14.00 horas do xoves 30 de setembro.
A proposta forma parte da programación da Rede Cultural da Deputación da Coruña.
DeMente é unha obra de baile e música tradicional galega para público adulto de 60 minutos de duración. Conta cun elenco artístico de oito bailadoras e bailadores, ao son da música do compositor e músico multidisciplinar Cristian Silva Bóveda. Todo isto desenvólvese dentro dun marco escénico e cun vestiario deseñado por Carlos Alonso Alonso xunto coas importantes contribucións en iluminación de Fidel Vázquez Díaz. A parte máis física e a estética contemporánea preséntase a través dos ollos da bailarina e coreógrafa catalá Carla Diego Luque como directora artística.