Un home sufriu feridas de consideración esta mañá ao caer desde o tellado dunha casa situada no lugar do Souto, en Porto do Son.
O 112 Galicia tivo coñecemento dos feitos a través dun familiar do varón ferido, uns minutos despois das doce.
Axiña, os xestores do 112 Galicia pasaron o aviso aos profesionais de Urxencias Sanitarias de Galicia-061, que mobilizaron un helicóptero medicalizado ata o lugar do suceso e no que o home precipitado foi evacuado ao centro hospitalario de referencia.
Ademais, desde o Centro Integrado de Atención ás Emerxencias (CIAE) 112 Galicia solicitaron a intervención da Policía Local, de Protección Civil e do GES de Noia para prestar colaboración e apoio ao equipo médico desprazado na aeronave.
