O Auditorio da Casa da Cultura de Boiro vai dar acollida este 1 de outubro ao espectáculo Illas desertas, unha proposta de teatro contemporáneo para público adulto a cargo da agrupación ArtesaCía e protagonizada por Laura Villaverde e Roi Fernández.
Unha vez máis, a capacidade será limitada por mor das restricións da COVID. As entradas poranse á venda no propio día da función. O espectáculo, organizado polo Concello, dará comezo ás 21.00 horas.
Segundo nos conta a produtora Urdime, Illas desertas é un espectáculo que nace “como resposta un mundo competitivo que só sabe camiñar nunha única dirección: a de facernos produtivas”. O espectáculo propón unha travesía cara a nada, ancorada na narrativa e na poesía audiovisual onde o público é parte activa da peza. “Illas Desertas é unha experiencia inútil, unha viaxe cara á nada, un canto ao fracaso, unha conquista do inútil, unha viaxe interior”, engade a produtora.
A través do movemento, das voces en off, da realización de cinema en directo, da interpretación, do son, da poética dos obxectos, da construción de maquetas e do traballo con máscaras xéranse paisaxes escénicas cunha enorme carga poética, salpicados das experiencias e reflexións de dous aventureiros: a aviadora Amelia Earhart e o explorador Ernest Shackleton.
Illas Desertas conta co apoio de AGADIC, Compañía Fura dels Baus, Colectivo RP, Sala Ingrávida, Concello de Santiago e Teatro Rosalía de Castro da Coruña e Concello de Tui.
Técnica: Susana Méndez
Actriz e creadora escénica: Laura Villaverde
Artista multimedia: Roi Fernández
Deseño de Luces: Héctor Pazos
Deseño de vestiario e caracterización: Esther Quintas
Produción: Marga R. Tilve
