Felipe Benavídez, única baixa no Rotogal Boiro Voleibol para visitar ao Guaguas

Avanza a conta atrás para ao inicio da Superliga. O Rotogal Boiro Voleibol debuta o sábado na pista do Guaguas, o vixente campión da competición. A única baixa do equipo será a de Felipe Benavídez, que se restablece dunha lesión no brazo, segundo confirmou o club boirense. “Cremos que, máis ou menos en dez días, estará xa preparado para adestrar”, apunta o técnico Marcelo “Chino” Benavídez.

O adestrador do Rotogal Boiro Voleibol define así ao estado de forma no que o equipo chega á primeira cita ligueira: “Imos mellorando moito. As dúas últimas incorporacións, Renan Levandoski e José Romero, aínda están nunha etapa de preparación, pero o resto do persoal está practicamente a un 80% da posta a punto”.

Sobre o primeiro rival da Superliga, Marcelo explica que “é un equipo moi forte, con moitos nomes. Fixo un investimento moi grande nos seus dous xogadores cubanos, pero os partidos hai que xogalos e ver que pasa. Para nós, cada encontro é un reto, tanto fora coma na casa”.

O Rotogal Boiro Voleibol comparece na cancha do campión despois de saldar con derrota os seus partidos de preparación. No entanto, Marcelo Benavídez réstalle importancia a este dato: “Sabiamos que a pretemporada ía ser moi difícil; arrincamos moi tarde coa preparación e tomámola como tal, como unha preparación. Así que non nos afecta en nada”.