Este sábado, con saída nas inmediacións da Pobra do Caramiñal, terá lugar a segunda etapa da Regata Alca, patrocinada pola empresa compostelá do mesmo nome. Os vencedores da primeira manga, Chispetrén, Piolín e Orlando, terán unha tarde complicada ante o empuxe dos seus rivais, que xa demostraron que a vitoria final é o obxectivo para moitos. A singradura, con saída prevista para as 14:00 baixo a organización do Club Náutico Arousa Norte, contará cunha quincena de embarcacións na liña de saída.
En ORC A, o Chispetrén, con Jesús Iglesias á roda, terá enfronte ao Alpha, do Náutico de Rianxo e tres barcos vilagarciáns dun altísimo nivel, destacando entre eles ao máis grande da frota, o flamante Fist 50 Corsario, de Jorge Durán, que non lle porán nada fácil as cousas ao actual líder da categoría.
Segundo informa o Náutico da Pobra, a clase ORC B é a que máis aberta está e “na que calquera se pode acabar impoñendo nesta etapa, con embarcacións como Piolín, Sempre Volve, Fixius ou Truhán, que poden puntos uns puntos moi valiosos nos seus marcadores”.
Polo que respecta á Clase ORC C xa demostrou a igualdade que presenta na primeira manga onde o Galopín e o Orlando tiveron unha estupenda pugna polo liderado. O Piko Norte, afeito loitar polos primeiros postos, tentará volver á senda da vitoria nesta segunda etapa. Polo que respecta ao Thor, que volve nesta regata á liña de saída despois dun tempo no dique seco, vai poñer todo da súa parte para sorprender aos a priori favoritos.
