O Club Ciclista Barbanza e o Concello de Boiro organizan a proba ciclista nomeada XXXIII Promoción Ciclismo, que se vai celebrar na dita localidade este sábado 2 de outubro a partir das 17.30 horas. Na proba, cuxos detalles foron achegados polos organizadores este mércores no Consistorio boirense, van participar as categorías promesas, principiantes, alevíns, infantís, cadetes e júniors fem. Na presentación interviron o concelleiro de Deportes, Marcos Fajardo, o presidente da Federación galega de Ciclismo, Juan Carlos Muñiz, e o presidente do Club Ciclista Barbanza, Ricardo Riveiro.
A saída e meta estará instalada na avenida da Constitución e o circuíto para os máis pequenos será na praza da Boqueira da Negral. Amais, as categorías de alevíns e infantís farán un circuíto pechado ao tráfico, de pouco máis de un quilómetro, dentro do propio termo municipal. Os cadetes farán un percorrido máis amplo entre os municipios de Boiro e Rianxo.
Hai inscritos preto de 350 corredores entre todas as categorías procedentes de clubs galegos e tamén algúns de Portugal. “Animar a todo o mundo que se achegue a ver esta proba, que está organizada seguindo todos os protocolos e medidas sanitarias, para desfrutar dunha tarde de ciclismo”, comentou Riveiro.
O presidente da Federación Galega de Ciclismo, Juan Carlos Muñiz, salientou o importante labor que desprega o Club Ciclista Barbanza na promoción do ciclismo.
O concelleiro de Deportes, Marco Fajardo, resaltou a importancia dos eventos deportivos para a promoción dun municipio e para o seu desenvolvemento económico. “Seguimos apoiando e fomentando o deporte, sobre todo o deporte de base, para que sigan facendo deporte como é neste caso o ciclismo e os hábitos de vida saudábeis ”, afirmou Fajardo.
