A Garda Civil de Noia a través da Patrulla Fiscal e de Fronteiras ( PAFIF) incautou 2.000 litros de gasóleo B en Ribeira. Segundo informa a benemérita os feitos ocorreron tras a localización dun vehículo industrial facendo uso fraudulento de gasóleo bonificado durante un control de carburantes na localidade da Pobra do Caramiñal. Ante a sospeita de que outros vehículos da empresa usasen fraudulentamente o mesmo tipo de carburante, procedeuse á inspección das instalacións da empresa titular.
No transcurso da mesma localizouse outro vehículo industrial co mesmo tipo de carburante no seu depósito e un depósito non autorizado con capacidade para 5.000 litros e que contiña 2.000 litros de gasóleo B.
A Garda Civil procedeu ao precinto do mencionado depósito e á confección das correspondentes actas-denuncia.
