Este venres 1 de outubro, A Pousada da Galiza Imaxinaria acolle un concerto da banda Cintaadhesiva, unha actuación coa que dá comezo, oficialmente, o curso da Escola Municipal de Música. A cita será ás 22 horas. Novamente o aforo será limitado, aínda que a entrada será libre (até completar a capacidade estipulada).
Cintaadhesiva é un proxecto literario-musical que se nutre co fío condutor da música de Jesús Andrés Tejada e os textos de Silvia Penas. Con sede en Vigo, o dúo xa ten media ducia de traballos musicais publicados. Participaron en festivais de poesía e do ámbito musical, en diferentes programacións teatrais, demostrando, pola súa natureza e polo seu carácter ecléctico, unha gran versatilidade para chegar a diferentes tipos de público. Recibiron recoñecementos en diferentes ámbitos, como proxecto finalista do premio musical da Deputación da Coruña 2017, finalista tamén nos Premios Martín Códax da música 2016, ou gañador do premio Sons Man Sinsal San Simón 2017.
