O Club Náutico Arousa Norte vén de compartir con nós o seu balance da primeira xornada da terceira edición da regata Alca, que se desenvolveu este sábado 11 de setembro. Segundo fai saber o club da Pobra do Caramiñal, organizador desta importante proba deportiva, houbo tres embarcacións claramente protagonistas en cada unha das súas modalidades: Chispetrén, Piolín e Orlando.
A crónica
Tras unha saída directa sen baliza de desmarque, todas as unidades dirixíronse a completar o percorrido consistente nunha volta á illa de Rúa polo seu cara norte. Ao paso por Rúa, o Chispetrén e o Santana’s, ambos veleiros da clase ORCA, chegaban igualados na cabeza tras unha cinguida con constantes viradas e férrea marcaxe por parte de ambas as unidades. Finalmente, un contratempo obrigaba á embarcación Santana’s a retirarse permitindo facer unha cómoda empopada ao Chispetrén, patroneado polo santiagués Jesús Iglesias. O podio completárono o Mus do C.N.Vilagarcía que apunta maneiras nesta a súa primeira participación na regata Alca e o Alpha do C.N Rianxo, que conseguiu facer unha regata de menos a máis e reporse dunha mala saída.
Na categoría ORC B, o Piolín de Rufo Fernández estreábase cun 1 na súa marcadora, seguido do Truhán do Club Náutico de Ribeira e do Sempre Volve do C.N. Arousa Norte, que tras máis de 3 horas de regata chegaban con tan só 4 segundos de diferenza en tempo compensado, no que foi o duelo máis igualado da xornada.
Na clase ORC C, o Orlando de Gerardo Sánchez-Brunete impúxose a un Galopín do Club Náutico Ribeira por tan só 50 segundos. O terceiro caixón do podio ocupouno un habitual dos postos altos, o Piko Norte, que nesta ocasión viuse minguado por un fallo loxístico que lle atrasou na aproximación á liña de saída. Segundo informou a organización da regata, este trío protagonizou unha preciosa loita a 3 bandas practicamente en tempo real dado o case idéntico rating das embarcacións. Na clase ORC C cabe destacar ademais a presenza dun clásico da ría como é o Thor II, patroneado por Guillermo Varela, que ocupou a cuarta praza no que foi a súa primeira regata de posta a punto.
O vindeiro sábado 25 de setembro terá lugar a 2° das 4 mangas que completan esta edición da Regata Alca con todo por decidir e coa presenza xa confirmada de novas unidades na liña de saída.
