As xogadoras do Club Volley Playa Madrid percorreron un tramo do Camiño A Orixe

As xogadoras do Volley Playa Madrid aproveitaron o pasado sábado a súa participación nun torneo de voleibol en Palmeira para coñecer e percorrer un treito do camiño de Santiago A Orixe.
Acompañadas dos edís municipais Javier Sampedro e Juana Brión e do presidente da Asociación de Amigos de Camiño A Orixe, Manuel Mariño, as deportistas e outros membros do club —entre eles, o ribeirense Ramón González, directivo— completaron un quilómetro e medio entre o paseo de Coroso e a igrexa parroquial de Palmeira antes de retornar ao pavillón polideportivo onde a competición tivera lugar.
As xogadoras madrileñas tiveron oportunidade de escoitar algunhas das curiosidades deste itinerario que está a ser recuperado e divulgado co gallo deste dobre Ano Santo.