A Asociación Amicos, centrada en achegar dende a nosa comarca formación, inclusión e inserción para os colectivos de persoas con diversidades funcionais ou motrices, vén de asinar un convenio de colaboración co Concello da Estrada para a cesión dun espazo físico no viveiro de empresas deste municipio pontevedrés.
Con esta iniciativa, Amicos pretende dar apoio a persoas en risco de exclusión que teñan dificultades para acceder ao mercado laboral: “Queremos que as persoas poidan ter novas oportunidades dentro dun mercado laboral cada vez máis complexo e esixente”, comentan.
Pablo Penide, técnico de desenvolvemento de persoas de Amicos, encargarase de orientar, informar e asesorar na procura de emprego e formación, elaborando un perfil profesional e un diagnostico ocupacional e creando tamén itinerarios personalizados de inserción.
O obxectivo de Amicos é dar apoio directo a un número aproximado de entre 75/100 persoas con discapacidade ou en risco de exclusión social da Estrada e a súa zona de influencia. Outro dos obxectivos da entidade será a prospección e intermediación sociolaboral con empresas da zona.
Miguel Beiro responsábel do departamento de emprego e empresas da asociación Amicos quixo recalcar que “que a asociación leva máis de 20 anos pelexando pola inserción sociolaboral de persoas con discapacidade, pero chegou o momento de facelo en rede, grazas a alianzas como esta multiplicaremos a nosa mensaxe e o noso labor”.
Por parte do concello, o alcalde José López Campos comentou o seguinte: “Agradezo a Amicos a oportunidade de poder asinar este convenio de colaboración xa que para nós é unha nova oportunidade de inserir laboralmente a persoas que teñan dificultades á hora de acceder ao mercado profesional”.
A asociación do Barbanza agradeceu enormemente ao alcalde e ao Concello da Estrada a implicación e a oportunidade de poder levar a cabo a asinar deste convenio de colaboración. E fixo a seguinte proclama: “Desde Amicos facemos un chamamento para que as persoas con discapacidade ou en risco de exclusión social que precisen apoio, e tamén para as empresas que necesiten incorporar a persoas, establezan contacto coa nosa área de emprego no seguinte número de teléfono 981 865 786 ou no correo de persoas@amicos.org”.
