No animo de visibilizar, concienciar, sensibilizar e facer reflexionar á poboación ante a próxima conmemoración o 17 de outubro do Día Internacional para a Erradicación da Pobreza, a Asociación Barbancesa de Axuda e Solidariedade (ABAS) promove a celebración dun concurso de fotografía cuxas bases foron presentadas este mediodía no Centro
Cultural Lustres Rivas nun acto que contou entre outros coa participación da concelleira de Cultura, María Sampedro; do coordinador de ABAS Francisco Javier Gómez; de Jesús Paz, membro desta organización; e de Javier Falque en representación da compañía local de telefonía ToxoTelecom.
Así, poderá participar toda persoa que sexa maior de 18 anos. A temática será, directa ou indirectamente, a pobreza e a exclusión social en todas as súas expresións e situacións. Cada fotografía virá acompañada dun título e dunha explicación, non superior a 200 palabras, en galego.
Poderán presentarse ata dúas imaxes por persoa, que non fosen premiadas en ningún outro concurso, con total liberdade de técnica e procedemento, en formato JPG, cunha resolución mínima de 300 ppp e un máximo de 8 MB, sen estar comprimida. As fotografía non terán marca de auga, sinatura nin ningún outro elemento que facilite
recoñecer a súa autoría.
As e os participantes deben enviar as imaxes a coordinador.abas.asoc@gmail.com, xunto coas fotografías
achegarase un documento coa descrición e outro con nome, apelidos, teléfono, email, enderezo, DNI e cun texto onde diga “DECLARO: Autorizar á Asoc Barbanecesa de Axuda e Solidariedade – ABAS a utilizar as miñas imaxes en soportes físicos ou dixitais, así como en exposicións, sen ningunha remuneración a cambio, sempre que non exista ánimo de lucro”, este último documento virá asinado e en formato pdf. O prazo será ata as 00:00 horas do día 6 de outubro do
presente ano.
Premios
Os premios, segundo o ditame dun xurado composto por tres persoas con coñecemento nas materias, serán os seguintes:
1º Premio: Unha tablet de 64 GB Blackview.
2º Premio: Caixa de experiencia “Desconecta 2 días” para 2 persoas, 1 noite de hotel + almorzo a escoller entre 1300
estancias de España e Portugal” por cortesía da empresa Toxo Telecom.
A organización agradeceu a Toxo Telecom o xesto de querer colaborar nesta nova iniciativa a prol da sensibilización sobre a pobreza na nosa sociedade.
