O secretario xeral de Cultura, Anxo M. Lorenzo, participou hoxe na entrega dos XII Premios de Gravado Atlante postos en marcha pola Fundación Museo de Artes do Gravado á Estampa Dixital e que este ano recaeron nos artistas Rajel Bronfman, Tomasz Winiarski e Deborah Chapman.
Durante a entrega de premios, o representante da Consellería de Cultura, Educación e Universidade puxo de manifesto a importante traxectoria destes galardóns que “nos seus doce anos de historia puxeron en valor o papel dos creadores e artistas, polo que desde a Xunta damos continuidade ao noso apoio a iniciativas como esta cada ano”, indicou.
Referiuse á importancia de apoiar aos creadores, como vén facendo tamén o Goberno autonómico que no marco do Plan de reactivación cultural ten en marcha unha serie de medidas específicas para o sector das artes plásticas. Cun orzamento de máis de 600.000 euros, estas accións inclúen desde o apoio ás galerías de arte ou a compra de obras de
arte ata a creación dunha nova liña de apoio aos creadores e comisarios de arte ou o impulso do Encontro de Artistas Novos.
Apoio constante
Xunto este apoio, recordou que o Goberno autonómico leva anos colaborando con outras administracións e entidades para axudar a que as súas actividades se manteñan adaptándose ao actual contexto sanitario. É o caso do Museo do Gravado de Ribeira, para o que nos últimos anos se achegaron máis de 80.000 euros para a ampliación da súa Biblioteca Ilustrada e neste 2021 se asinou un convenio de máis de 45.000 euros para apoiar a ampliación do Obradoiro de Gravado Permanente do museo que foi creado para formar artistas e amantes da arte gráfica.
Na XII edición dos Premios do Gravado Atlante foron galardoados os artistas Rajel Bronfman, Tomasz Winiarski e Deborah Chapman. Ademais, recibiron mencións de honra os artistas Mirta Gendin, Vinicius Libardoni, Paco Casal e María Meijide Fraga. Tamén foron seleccionados máis de 40 gravados que se exporán nunha das salas do museo cos
premiados e finalistas.
O Museo do Gravado de Ribeira ten unha colección que supera as 40.000 estampas procedentes de máis de 400 artistas. É un dos recursos culturais máis importantes da comarca do Barbanza. Ademais, dispón dunha destacada biblioteca ilustrada que é única en Galicia debido ao seu valor bibliográfico e artístico, con máis de 3.000 libros, así como pola cantidade de gravados que contén e pola singularidade dos seu volumes, que abranguen desde o século XVI ao XXI.
