Quen queira apoiar o comercio de Ribeira e obter a cambio un recoñecemento ao este importante labor de compromiso cos establecementos de proximidade vai poder facelo este mes de setembro grazas á nova campaña de dinamización empresarial e premios á cidadanía lanzada pola Asociación de Empresarios de Ribeira. Trátase da iniciativa Volta Ao Cole 2021, que inclúe un sorteo de 20 vales de 50 euros dirixido a todos os clientes que merquen e consuman nos establecementos asociados.
O obxectivo fundamental da campaña é “incrementar as vendas e incentivar o consumo no pequeno comercio ao por menor e na hostalería de Ribeira”.
Segundo fixo saber recentemente o presidente da Asociación de Empresarios, Francisco Martínez Gude, a promoción realizarase entre as compras e consumicións feitas desde o día 1 ao 30 de setembro de 2021. “A forma de participar será mercando e consumindo en calquera establecemento socio”, explicou, engadindo que o sorteo realizarase o venres 1 de outubro ás 13:00 horas no local da Asociación de Empresarios, na rúa Rosalía de Castro.
O rexistro será preciso realizalo na pestana Sorteos, na web da Asociación de Empresarios de Ribeira, efectuando o correspondente rexistro da compra ou consumición realizada, que dará dereito a unha participación no sorteo.
Os premios serán 20 vales de compra de 50€ para gastar nos establecementos comerciais e hostaleiros socios. O importe do premio debe ser gastado nos establecementos participantes como data límite o 30 de novembro de 2021.
Amais, as familias numerosas que se personen nas nosas oficinas xustificando esta condición, de presentaren un tícket de compra ou consumición por valor superior a 10€ con data do 1 ao 30 de setembro, recibirán un agasallo ata fin de existencias.
A maiores desta campaña, a patronal informou de que “unha vez notificadas as novas medidas para os sectores de hostalaría e restauración”, a asociación facilitará a realización dos cursos de formación COVID que require Sanidade para os seus socios de hostalaría e restauración.
