A Asociación Boirense de Empresarios (ABE) vén de realizar unha petición formal ao Concello de Boiro para que prorrogue durante o ano 2022 a exención do cobro da taxa de instalación de terrazas. O argumento principal do requirimento é “a necesidade de apoio a un dos sectores mais afectados tanto pola pandemia como pola normativa actual anti-COVID”.
Neste sentido dende a ABE entenden que sería “unha medida de impulso á hostalería” que, xunto coas xa demandadas anteriormente pola patronal como a dotación dunha liña de axudas específica ou a posta en marcha dun sistema de incentivos por bonos, “poderían axudar á reactivación do sector”.
Así mesmo a ABE pide que se realice a xestión con celeridade para evitar problemas como o que “agora mesmo nos atopamos co cobro de 1 mes da taxa de 2021 por demora na tramitación” e que tamén se solicitou ao Concello que se devolva ou compense.
Cabe recordar que a ABE conta actualmente con 200 asociados dos que case un 20% (39) son do sector hostaleiro sendo un dos sectores con mais peso na entidade.
