Xa hai máis de 200 persoas inscritas para a cuarta Travesía a nado Illa de Bensa que se celebra este domingo

Este 25 de agosto presentouse no Consistorio de Boiro a cuarta edición da Travesía a nado Illa de Bensa, que se celebra este domingo en Carragueiros, con máis de 200 persoas inscritas para as distintas categorías. A proba vén da man do Club de Natación Boiro e conta coa colaboración do Concello.

Na presentación estiveron o concelleiro de Deportes, Marcos Fajardo; o director técnico do club, Juan Carlos Brión; e representantes das principais empresas patrocinadoras, JEALSA e Clínica Dental Rebeca Ozores, Margarita Hermo e Rebeca Ozores.

As inscricións están abertas ata as 00.00 horas do xoves día 26 de agosto.

Segundo fixeron saber, a travesía vai mudar o seu formato con respecto a edicións previas, xa que este ano hai varias saídas para cumprir cos protocolos COVID-19. Así, as categorías élite e máster farán un percorrido de 3.000 metros; alevín, infantil e popular será de 1.200 metros e a de menores será de 200 metros. Por primeiro ano a travesía será inclusiva para persoas con mobilidade reducida para as categorías de 1.200 e 200 metros.

A primeira das saídas será as 10.30 horas e a entrega de premios será na praia ás 14.00 horas.