Este venres 20 de agosto toca desfrutar do novo circo en Boiro, concretamente nas escaleiras do Parque da Cachada a partir das 21.30 horas. Alí teremos unha cita coa Gran Gala do Circo, un espectáculo de variedades (circo e music-hall) da agrupación PistaCatro para todos os públicos.
O aforo será limitado, por mor das medidas anti-COVID. Podemos reservar entradas a través da páxina web municipal, www.boiro.gal, dende dous días antes da función.
A Gran Gala do Circo de PistaCatro é, en palabras dos integrantes da agrupación, “a flor e nata” das expresións artísticas circenses, unha compilación dos maiores éxitos do grupo e dos mellores momentos de cada artista reunidos nun só volume. Haberá contidos propios do circo e do music-hall pero tamén números de malabares, de cancións, sketchs de humor, monólogos, acrobacias e mesmo pasos de claqué, entre outros. Ofrécese así ó público “un espectáculo multidisciplinar e variado a cargo dun determinado número de artistas que dan o mellor de si mesmos en pequenas pezas de cinco ou dez minutos”.
