O director Ignacio Vilar estará este Boiro este domingo na proxección do seu filme Sicixia

A Concellería de Cultura de Boiro vai deparar a cidadáns e visitantes a proxección do filme Sicixia, que inclúe un encontro directo co seu director, o galego Ignacio Vilar. Será este domingo 22 de agosto, na praza da Terceira Idade de Boiro. A actividade pertence a un roteiro cinematográfico Cine na rúa, que inclúe as proxeccións dalgúns dos filmes da nosa terra máis relevantes dos últimos anos.

Sicixia é unha longametraxe galega de ficción dirixida en 2016 por Ignacio Vilar en plena Costa da Morte, seguindo as pescudas, a xeito de caderno de viaxes, dun documentalista sonoro interpretado por Monti Castiñeiras e a súa guía Olalla (a quen dá vida Marta Lado), que traballa na recolleita de argazo e que terá o poder para transmitir ao protagonista o amor polas impresionantes e fermosas paraxes dos concellos da dita comarca coruñesa.

Na presentación do filme participará a concelleira de Cultura, María Outeiral, xunto co director, Ignacio Vilar. Un encontro que, tras a proxección rematará cun coloquio arredor do tema Vivir do mar. A proxección deste filme dentro deste roteiro está apoiado pola Secretaría Xeral de Política Lingüística a través do II fondo de proxectos culturais Xacobeo 2021-2022.

Para cumprir con todos os protocolos e restricións sanitarias, a capacidade para a proxección é limitada e deberanse seguir todas as medidas de prevención. A reserva de entradas está dispoñíbel en www.boiro.gal.