O Concello recoñece os éxitos das categorías inferiores do Boiro Voleibol

O Concello de Boiro celebrou este luns 23 de agosto a recepción oficial das categorías inferiores do equipo local de voleibol, como recoñecemento dos bos resultados acadados nos Campionatos de España celebrados en cada unha das categorías. No acto estiveron o alcalde, José Ramón Romero, o concelleiro de Deportes, Marcos Fajardo, os adestradores do club Adrián Alves e Fernando Castaño e representantes das principais empresas patrocinadoras, JEALSA e Rotogal: Margarita Hermo e Jorge Fajardo.

O concelleiro de Deportes, Marcos Fajardo, fixo entrega dunha distinción ao equipo infantil do Boiro Voleibol polo 10º posto acadado no Campionato de España celebrado no mes de xuño Soria. O representante de Rotogal, Jorge Fajardo, fixo entrega da distinción a equipo cadete, actual campión galego e 5º de España na proba celebrada en Castellón no mes de xuño.

O alcalde, José Ramón Romero, e a directora de Relacións Institucionais de JEALSA, Margarita Hermo, fixeron entrega dun agasallo individual a cada un dos membros do equipo e tamén unha placa que conmemora ao equipo xuvenil, actual campión galego e tamén de España, no campionato celebrado en Boiro no mes de xuño.