O Concello de Porto do Son vai desenvolver esta tempada un servizo de atención personalizada e especializada para mulleres con discapacidade. Será entre os días 11 de agosto e 13 de outubro, no local social da vila.
Forma parte do programa Enrédate (terceira edición) e inclúe servizos de atención persoal e especializada para mulleres con diversidades cognitivas ou motrices e vulnerábeis, sesións individuais e grupais e formación en empoderamento, habilidades sociais, manexo e uso das TIC (Tecnoloxías da Información e a Comunicación), autoconcepto e autoestima, intelixencia emocional, prevención da violencia contra as mulleres e discapacidade. Promove a área de Benestar e Igualdade de Porto do Son.
O programa Enrédate, co-financiado pola Secretaría Xeral da Igualdade e o Fondo Social Europeo, proporciona unha atención personalizada e especializada ás mulleres con discapacidade residentes en núcleos de baixa densidade de poboación das provincias de A Coruña e Pontevedra. A iniciativa, gratuíta, ten como meta “a emancipación, tamén, da muller rural e con discapacidade potenciando as súas capacidades para poder desenvolver unha vida máis autónoma e independente”.
