“O clima, un aliado para a prevención de incendios na comarca” – Pedro Pérez

Galicia sempre se caracterizou por ser unha terra con gran riqueza vexetal, así como por un clima suave. Isto último é un dos aspectos que máis se cuestionan, sobre todo coa chegada do verán. Grandes paraísos marítimos, espectaculares praias e paseos fluviais que non se poden desfrutar por mor do denominado “mal tempo”. Mais co cambio climático, e o ascenso de temperaturas que se deu en anteriores temporadas estivais, a terra galega, e tamén a comarca do Barbanza, viviu unha serie de incendios que queimaron e terminaron con toda esta riqueza natural.

Recordadas son as vagas de incendios do 2006, con máis de cen lumes cada día, onde os equipos de extinción tiveron grandes problemas para apagalos, algo ao que se lle uniu a falta de limpeza dos montes. As altas temperaturas foron a principal causa de que os incendios, moitos provocados tamén polo ser humano, fosen máis habituais e difíciles de extinguir. Sen embargo, este ano, excepto estas dúas últimas semanas, a comarca rexistrou algunhas das temperaturas medias máis baixas dos últimos veráns, ademais de rexistrar múltiples xornadas con precipitacións. Unha situación que provoca que ata o de agora, salvo casos excepcionais, os incendios non teñan peso nesta temporada estival.

Sen embargo, estas condicións climatolóxicas, con altas taxas de humidade, provocan o crecemento da maleza nos montes, especialmente en retamas e toxos, un problema que este ano se está a solucionar de maneira inmediata coas labores de prevención de incendios, levando a cabo limpezas destas zonas que en caso de lume poden ser moi perigosas. Por todo isto, polos profesionais que se encargan de manter en orde todo para prever incendios, así como particulares que se preocupan porque este sexa así, pero sobre todo ao clima galego, ao da nosa terra, que ás veces o castigamos e criticamos indebidamente, debemos dar as grazas.