O alumnado do programa de emprego O Pote II, promovido polo Concello de Ribeira e centrado na formación da mocidade local en materia gastronómico-hostaleira, contou este luns 23 de agosto coa visita dos chefs do departamento de Investigación e Desenvolvemento (I+D) da empresa pobrense CONGALSA.
No marco do obradoiro, subvencionado pola Xunta (Consellería de Economía) e co-financiado pola iniciativa de emprego xuvenil e o Fondo Social Europeo, os profesionais da compañía alimentaria da Pobra do Caramiñal achegaron unha clase maxistral (masterclass) na que mostraron o proceso de cociñado e empratado de diversos produtos preelaborados da súa marca da hostalería Ibercook Food Service.
En concreto, os chefs prepararon e emprataron bocareus en escabeche; mini-rolos de primavera con salsa thai; hot dog de rabas con queixo e concasse de tomate; bao de chipirón con cebola caramelizada e maionesa crítica e culleriñas de bacallau en tempura con espuma de piquillo, aire de limón e triscante de queixo.
A acción enmárcase no programa de emprego e dá resposta á necesidade de achegar a formación e o mundo laboral ao alumnado do obradoiro, ao que tempo que se difunde o potencial de empresas punteiras do sector alimentario como é o caso de CONGALSA.
O alumnado participante no programa está a se formar no certificado de profesionalidade de operacións básicas de cociña e operacións básicas de pastelaría.
Estes programas de emprego van dirixidos á mellora da ocupación, cualificación e inserción profesional das persoas inscritas.