O delegado do Goberno en Galicia, José Miñones, visitou na mañá deste 12 de agosto o concello de Boiro, onde puido coñecer de primeira man algúns dos máis destacados proxectos do Goberno local en materia de sustentabilidade e equipamentos. Por exemplo os proxectos de substitución do alumeado en diferentes emprazamentos municipais (incluído o Pavillón da Cachada) por luminarias sustentábeis e eficientes, iniciativa que foi desenvolvida con financiamento do Ministerio para a Transición Ecolóxica.
Na súa visita Miñones estivo acompañado do alcalde, José Ramón Romero, o tenente de alcalde, Luis Ruiz, e o concelleiro de Comercio e Industria, Marcos Fajardo. Miñones prometeu máis Internet de alta velocidade a través do Plan estatal de Banda Larga (que beneficia este ano a 800 vivendas, que soben deste xeito ao carro das novas telecomunicacións) e máis e mellores esforzos para ampliar a superficie industrial (cousa que foi solicitada polo rexedor durante a súa estadía deste 12 de agosto en Boiro). Neste último punto, o delegado comprometeuse a dar traslado das necesidades de ampliar o Polígono á xerente do Solo Empresarial do Atlántico (SEA), Beatriz Sestayo, co obxectivo de activar os trámites.
O delegado do Goberno situou a dinamización do rural e o reto demográfico como prioridades que comparten o Executivo e o Concello de Boiro: “O municipalismo é unha das nosas prioridades, como tamén o son a promoción socioeconómica do rural e o desafío da poboación, tres asuntos nos que coincidimos co Goberno local de Boiro”, afirmou José Miñones.
No Pavillón Polideportivo da Cachada, José Miñones e José Ramón Romero recordaron que as instalacións recibiron unha achega do Ministerio para a Transición Ecolóxica, a través do Instituto para a Diversificación e Aforro da Enerxía, para cambiar o seu alumeado e dar importantes pasos adiante en materia de eficiencia enerxética. En total foron 267.501,72 euros para varios proxectos do Concello relacionados coa transformación dos alumeados exteriores en zonas rurais e os existentes en pavillóns como o da Cachada.
O delegado do Goberno destacou tamén que o Ministerio de Asuntos Económicos e Transformación Dixital ten en marcha o Programa de Extensión de Banda Larga de Nova Xeración, do que en Boiro hai 800 vivendas beneficiarias do servizo de Internet de alta velocidade en 2021, e que vén de aprobar un novo investimento para este plan.
