A Casa da Cultura de Porto do Son vai acoller este sábado 7 de agosto a presentación do libro para público infantil Don Carlos e o misterio dos lucecús (Baía Edicións), da escritora, xornalista e museóloga local Patricia Torrado Queiruga.
A cita será ás 20.00 horas, e contará coa presenza da autora, que estará acompañada polo concelleiro de Cultura, Juan Pouso, do escritor Manuel Mariño e pola directora de Baía Edicións, Belén López Vázquez, que se encargarán de realizar un achegamento crítico a esta obra dirixida ao público infantil.
Argumento (Baía Edicións)
Na vila comezan a xurdir sucesos inexplicábeis e, por se fose pouco, na casa contáronlles que o seu profesor, o único que os podería axudar a buscar unha explicación a tanto misterio, padece unha enfermidade que lle fai esquecer as cousas.
Xiana, Maca, Román, Sofía e Afonso convídante a desentrañar cada misterio coa axuda de don Carlos. Unhas pescudas que vos levarán a valorar o lugar no que vivides, o medio ambiente, as tradicións, o amor e os prexuízos cos que podemos atoparnos todos os días. Acompáñasnos?
