Este domingo 29 de agosto celébrase na nosa comarca unha das grandes citas deportivas da tempada: a décimo segunda edición da Carreira Popular Concello da Pobra do Caramiñal, a cal organiza a Administración local, a Asociación de Atletismo e Deportes do Barbanza e a Federación Galega de Atletismo. Ao acto de presentación (este 25 de agosto) asistiron o alcalde, Xosé Lois Piñeiro (Nós Pobra); a concelleira dos Deportes, Genoveva Hermo (Nós Pobra); a técnica municipal desta área, Ana Romero, e o presidente da Asociación de Atletismo e Deportes do Barbanza, José Moure.
As probas poderán disputalas tanto atletas federados/as en atletismo coma non federados/as e estarán baixo o control técnico do Comité de Xuíces da Federación Galega de Atletismo.
Este evento deportivo dará comezo ás 10.45 horas e as categorías de competición irán dende a sub-8 ata a máster. Segundo informaron, as saídas efectuaranse dende a contorna da Casa Mariñeira, no lado de beiramar, de dez en dez atletas en intervalos de 20 segundos, e a meta situarase no interior da praza Alcalde Segundo Durán, lugar onde se procederá coa entrega de premios a partir das 13.30 horas. Outorgaranse trofeos ós/ás tres primeiros/as clasificados/as por categoría, premios en metálico e agasallos ós/ás cinco primeiros/as clasificados/as da xeral, e camiseta técnica para os/as participantes na proba absoluta.
As inscricións realizaranse a través da páxina web www.emesports.es. O prazo ficará aberto ata as 14.00 horas deste 26 de agosto e estímase unha participación de arredor de 600 persoas.
Esta carreira pertence ao Calendario Oficial da Federación Galega de Atletismo. Contarase coa colaboración da Protección Civil e será de obrigado cumprimento en todo o momento o protocolo FISICOVID-DXTGALEGO.
