Esta fin de semana celébrase a XXV edición da Regata Cruceiro – Hotel Galatea

O Concello de Boiro colabora, un ano máis, coa celebración da Regata Cruceiro – Hotel Galatea que chega á súa XXV edición, a novena que se celebra en augas locais. A competición, organizada polo Club Náutico de Portonovo, a Real Federación Galega de Vela e a Fundación Galega para o Deporte coa colaboración do Club Náutico de Barraña, celébrase esta fin de semana na ría de Arousa.

Van participar entre os 20 e 25 barcos, repartidos en cinco clases e categorías, que son Open, ORC grupo 1, ORC grupo 2, ORC A 2 e solitarios. A regata consta de dous tramos costeiros, saíndo de Portonovo o sábado pola mañá e chegando a Boiro o sábado pola tarde e, o segundo tramo sairá desta localidade o domingo a mediodía a chegará a Portonovo pola tarde. A principal novidade deste ano é que a regata recala por primeira vez no Náutico de Barraña.

Na presentación, que se realizou este 18 de agosto, estiveron o alcalde, José Ramón Romero, o concelleiro de Deportes, Marcos Fajardo, e os presidentes dos dous náuticos, Javier Ruiz de Cortázar Díaz, do Club Náutico de Portonovo, e Antonio Oriois, do Club Náutico de Barraña. As preinscricións aínda están abertas e para facela é preciso remitir a documentación necesaria ao enderezo electrónico regatas@nauticoportonovo.com.