Sesenta cativos dos campamentos de conciliación de Ribeira visitaron o Consistorio

O Consistorio de Ribeira acolleu este 11 de agosto unha das actividades dos campamentos adscritos aos Bonos Concilia CampaRibeira Verán que promove a Concellería de Cultura –o organizado por Golfiño. En concreto, sesenta nenas e nenos que están a participar nun destes campamentos tiveron ocasión de coñecer o servizo cotián que se desenvolve dende a Casa Consistorial.

Os pequenos foron recibidos en diversas quendas polo alcalde Manuel Ruiz, quen lles explicou como é o día a día no Concello e os servizos que dende alí se fan para atender á cidadanía.

A actividade está enmarcada na programación mensual organizada por Golfiño para dar a coñecer aos menores a cidade e o municipio. Xa visitaron a lonxa de Aguiño, a Sala Museo Municipal, o periurbano de San Roque, o GAEM ou a Policía Local, así como diversas prazas e rúas do casco urbano.