Dous novos falecidos elevan a 2.483 as vítimas pola Covid-19 en Galicia. O país rexistra 18.643 casos activos

O número de vítimas mortais ligadas á pandemia de Covid en Galicia ascendeu este xoves a 2.483, tras notificar as autoridades sanitarias dous novos falecementos este xoves.

A Consellería de Sanidade informou do falecemento de dúas persoas que foran diagnosticadas con coronavirus.
Unha delas faleceu o mércores, día 4. Trátase dun home de 93 anos, e produciuse no Complexo Hospitalario Universitario de Ferrol.

A outra morte, unha muller de 90 anos, rexistrouse na xornada deste xoves, en concreto no Complexo Hospitalario Universitario da Coruña. En ambos os casos, presentaban patoloxías previas.

Por outra banda a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 18.643 deles 4.297 son da área da Coruña, 2.171 da de Lugo, 1.596 da de Ourense, 2.662 da de Pontevedra, 4.623 da área de Vigo, 2.214 da de Santiago e 1.080 da de Ferrol.Do total de pacientes positivos, 52 están en UCI, 250 en unidades de hospitalización e 18.341 no domicilio. Polo de agora, en Galicia hai un total de 141.036 persoas curadas, rexistrándose 2.481 falecementos.  O número de PCR realizadas é de 2.596.454. O número de doses de vacina contra a covid-19 administradas é de 3.579.863.