As novas restricións por covid prohiben utilizar barras nos locais hostaleiros en nivel alto e medio, e no medio-baixo, só para pedir e recoller consumicións.
Os locais hostaleiros galegos non poderán servir ao público máis aló das 23,00 horas, aínda que terán a posibilidade de estender este horario ata as 1,00 horas para despachar pedidos a domicilio –recollida no local ou entrega aos clientes–.
Esta é unha das novas medidas que entrarán en vigor para a hostalería ás 00,00 horas do 21 de agosto e que se manterán, en principio, ata o 4 de setembro, tal e como recolle o Diario Oficial de Galicia (DOG) publicado na tarde deste venres.
A hostalería das localidades en nivel máximo poderán prestar servizos de recollida no local e de consumo a domicilio, de entrega a domicilio e de terraza co 50% da capacidade máxima permitida. Estes establecementos permanecerán pechados ao público para o consumo no interior do local.
Nos concellos en nivel alto, a hostalería poderá realizar servizos de recollida no local e de consumo a domicilio, de entrega a domicilio e de terraza co 75% da capacidade máxima e, en interiores, cunha ocupación do 30%. Nestas localidades, non se poderá prestar servizo na barra.
Os veciños de localidades en nivel medio poderán acudir aos establecementos hostaleiros para servizos de recollida no local e de consumo a domicilio, de entrega a domicilio e de terraza co 100% da capacidade máxima, e tamén de servizo no interior cunha ocupación do 50%. Aquí tampouco se poderá prestar servizo na barra.
En canto ao nivel medio-baixo, a hostalería poderá prestar servizos de recollida no local e de consumo a domicilio, de entrega a domicilio e de terraza co 100% da capacidade máxima permitida, así como no interior, cunha ocupación do 75%. Nestas localidades si se poderá utilizar a barra, pero só para solicitar e recoller consumicións, non para realizar o consumo nela.
Respecto a os horarios, Sanidade matizou que os locais non poderán admitir a novos clientes máis aló das 00,00 horas e que, aqueles que acudan a recoller algún pedido, deberán permanecer no interior o “estritamente necesario”.
Recalcan tamén que deberá asegurarse que se mantén a debida distancia de seguridade interpersoal entre as mesas ou, de ser o caso, as agrupacións de mesas, e a ocupación máxima será de seis persoas no interior e 10 persoas na terraza, por mesa ou agrupación de mesas.
O DOG recolle ademais modificacións para o sector do lecer nocturno. Os locais nocturnos das localidades en nivel medio poderán prestar servizos de terraza ao 75% da súa capacidade e ao 50% en interior; mentres que aqueles en nivel medio-baixo, tamén poderán servir no interior ao 50% pero ao 100% en terraza.
