Comeza a instalación das pezas de madeira da pérgola do parque infantil cuberto de Boiro

O parque infantil da praza de Galicia de Boiro está a ser obxecto esta tempada dunha serie de importantes melloras, entre as que se conta a instalación dunha cuberta con iluminación solar fotovoltaica. Esta actuación está valorada en 247.740,25 euros e execútase mediante o financiamento da Deputación da Coruña con cargo ao Plan Único Concellos (POS+).

O Concello explicou que estes días comezou a instalación da pérgola de madeira que conforma a estrutura do parque infantil cuberto da praza de Galicia. As trabes de madeira laminada de abeto branco contan cos certificados ISO 9001 de Xestión, o Certificado de garantía de rastrexabilidade do produto e o Certificado de estabilidade, constancia e durabilidade das prestacións dos produtos fabricados de ENAC, explicaron fontes do Goberno local, engadindo que a empresa fabricante, a cántabra Yofra S.A., conta con numerosos premios pola realización de proxectos singulares polo traballo con madeira.

A pérgola, duns 22×32 metros, irá pechada con laminas de policarbonato e servirá de acubillo para o parque infantil, a parada de autobús e o acceso ao estacionamento municipal e baños públicos dende a praza de Galicia.