Chega esta finde a sétima edición da Festa do Polbo de Palmeira

Logo da cancelación do ano pasado, por mor da COVID, esta finde retómase a Festa do Polbo de Palmeira, sétima edición. Celebrarase no recinto portuario da localidade. O evento foi presentado este 25 de agosto polos concelleiros Emilio Pérez Outeiral, María Sampedro e Ramón Doval.

A cita desenvolverase o sábado 28 e o domingo 29 de agosto e contará “cun completo calendario de actividades complementarias”, segundo fixeron saber na cita cos medios. A preparación do cefalópodo correrá a cargo unha vez máis do célebre polbeiro Manuel Veloso, estando prevista a apertura de portas para as 12 do mediodía do sábado.

Mesas para grupos reducidos

Segundo confirmaron, a diferenza de convocatorias anteriores, na carpa instalada na explanada non se colocarán as habituais mesas corridas senón que haberá mesas para grupos reducidos de acordo coa normativa sanitaria anti-COVID.

Tanto o sábado como o domingo ás 12 do mediodía haberá sesión vermú amenizada pola charanga Os Santiaguiños de Padrón. O pregón está previsto para as oito da tarde do sábado e será pronunciado polo maxistrado do Tribunal Supremo José Alberto Fernández Rodera. Antes e despois desta intervención actuará a cantante Thais Suki, en tanto que a partir das 21.30 horas será a quenda de Os Bugis no marco da programación das Rúas Musicais.

En canto ao domingo, a partir das 21 horas terá lugar a gala Camiño das Estrelas que tanto éxito tivera o verán pasado en Aguiño e que nesta ocasión contará coas actuacións de As Voces do Camiño (entre as mesmas, a da ribeirense Ana Paz), a acróbata Juliette, o mago David Maestro e os bailaríns de Grow As Ohana. A entrada é libre ata completar aforo.

A cita está organizada polo Concello de Ribeira coa colaboración dos bares A de Alejandro, Baluarte e Manolo o do Café e a comisión de festas.