O lugar de San Roque, en Cespón (Boiro), vai acoller este venres 27 de agosto un espectáculo para público infantil e familiar: 10 anos de Don Gelati, a cargo de Dani García. A cita será ás 20.30 horas. O espectáculo, abeirado ao Verán Cultural (completo programa de espectáculos estivais impulsado polo Concello en colaboración coa Deputación), terá novamente capacidade limitada e, quen queira entradas, deberá reservala a través da web municipal.
Don Gelati constitúe un sorprendente menú de maxia que nos pon ante as dificultades dun vendedor de xeados que chega un día de sol chega á praza dunha vila, co seu carriño e con moitas ganas de sacarlles un sorriso á veciñanza. Mais o pobre Don Gelati sufrirá todo tipo de imprevistos e infortunios co seu carro, que terá que arranxar con enxeño e cunha chea de maxia antes de que os seus xeados se derretan. Dani García constrúe, empregando a súa habitual destreza, “unha comedia máxica onde a expresión corporal substitúe ás palabras, e onde a comunicación co público é constante e dinámica”.
