Vivimos un período de crise económica, laboral, social e de valores. Evidentemente non é nada novo xa que, ao longo da historia, padecérona moitos pobos e países en todo o planeta, algúns deles sófrena de maneira permanente. Por iso todo vale con tal de cambiar as cousas achegando ideas innovadoras ou proxectos políticos e sociais diferentes.
O peor é que, calquera cidadán de a pé de maneira obxectiva e nada partidista pode observar como, cada vez, o máis rico faise máis rico e o máis pobre ten cada vez menos recursos. Os gobernantes mesmo se atreven a recortar en dereitos fundamentais (sanidade, educación, traballo, vivenda, pensións?) baixo a desculpa de que hai que aforrar e cadrar as contas.
Moitos cremos que a cuestión é ben diferente. Habería que saber xestionar os recursos públicos de maneira eficiente, dando prioridade ás persoas. O Estado actual non pode seguir gobernando para as grandes empresas multinacionais e os círculos financeiros, teñen que estar ao servizo dos cidadáns e as familias humildes, garantíndolles a gratuidade sanitaria, unha educación pública, unha vivenda digna, un posto de traballo acorde á súa categoría profesional. Os cargos públicos teñen que estar ao servizo dos que menos teñen, en función das rendas familiares e os que superen os limiares económicos, establecidos regulamentariamente, que se paguen a sanidade, a educación, a vivenda, etc. Só así poderemos conseguir unha sociedade menos clasista e máis xusta.
