Este martes 17 de agosto deu comezo en Boiro unha actividade formativa destinada a achegar coñecementos sobre operacións básicas no ámbito da hostalería (restaurantes e bares) a un total de dez mulleres da nosa contorna. A iniciativa desenvolverase ao longo dos vindeiros meses no Centro de Formación e Viveiro de Empresas do Concello de Boiro.
O seu obxectivo é fornecer de novas oportunidades laborais “nun sector clave da comarca do Barbanza”.
A acción formativa abéirase ao Programa Integrado de Emprego Amicos 2020/2021, cuxos contidos son impartidos polas técnicas da dita asociación Raquel Barrero Hernández, Rocío Vázquez Fernández, e Ángeles Sampedro Rego.
Para a docencia do devandito certificado cóntase coa colaboración da empresa de formación Recursos Galicia, e da sáa directora Xiana Zapata, que na mañá deste 17 de agosto asistiu á inauguración da iniciativa en Boiro, tendo a Ángeles Sampedro Rego, técnica da asociación, como anfitrioa.
A día de hoxe, o programa integrado da Asociación Amicos leva prestadas máis de 600 sesións de orientación, con máis de 800 horas de formación e xa leva acadadas un 40% de inserción laboral das participantes. Nas vindeiras datas iniciarase unha formación no ámbito da limpeza no concello de Ribeira.
Segundo explica Amicos, os programas integrados de emprego, son instrumentos dirixidos á mellora da ocupabilidade e á inserción laboral que se estenden ao longo dun período de 12 meses e que achegan contidos a persoas demandantes en situación de desemprego no ámbito da Comunidade Autónoma de Galicia.
Este programa, financiado polo Ministerio de Traballo, Migracións e Seguridade Social e pola Consellería de Economía, Empresa e Innovación da Xunta de Galicia, estará en funcionamento ata o vindeiro mes de novembro.
