A Pobra foi novamente unha das etapas estrela da Regata Mar de Maeloc

Os 51 veleiros participantes na Regata Mar de Maeloc/58ª Rías Baixas arribaron na tarde deste 11 de agosto ao Náutico da Pobra do Caramiñal, completando así a segunda etapa con saída dende Combarro. Alí foron recibidos pola concelleira do Turismo, Charo Varela (Nós Pobra); José Antonio Portela, presidente do Real Club Náutico de Vigo; e Jorge Alonso, subdirector xeral de Maeloc.

Durante a quenda de intervencións, a edil expresou o seu agradecemento por elixir un ano máis ao municipio como etapa do circuíto.

O acto coincidiu tamén coa entrega de premios ás embarcacións gañadoras da segunda etapa, quedando os resultados da seguinte maneira: Clase Open 2 (Nahela), Clase Open 1 (Txole), Clase 4-5 (La Burla Negra), Clase 3 (Bosch Services) e Clase 1-2 (Aceites Abril).

Logo, cada un dos barcos recibiu unha bolsa de agasallos, cortesía do Concello, composta por material de promoción do turismo, conservas de Ramón Franco (doadas pola propia empresa) e un viño da Denominación de Orixe Terra de Barbanza e Iria.

A travesía continuará na xornada deste xoves 12 de agosto coa terceira etapa A Pobra do Caramiñal-A Pobra do Caramiñal para, finalmente, proceder coa cuarta e última, A Pobra do Caramiñal-Vigo, lugar que constituíu o porto de saída e a primeira etapa unindo a cidade olívica con Combarro.